Të tjera detaje mësohen rreth ngjarjes së rëndë në Golem, ku burri vrau barbarisht gruan dy ditë më parë, teksa ndodheshin me pushime në bregdet.
Gazeta Shqiptare shkruan se Veli Dervishi 73 vjeç e ka vrarë gruan me gjakftohtësi dhe nuk ka qenë i alkoolizuar, siç ka deklaruar.
Nga testi i alkoolit nuk ka rezultuar të ketë qenë i dehur kur ka goditur për vdekje nënën e tre fëmijëve të tij.
Sipas hetuesve të çështjes, 73 vjeçari duke fajësuar gruan për shkakun e vrasjes, përpiqet të justifikohet para familjes dhe opinionit publik. Dyshimet për një vrasje të paramenduar kanë marrë shkas dhe nga dëshmia e dhënë nga i moshuari Dervishi.
Gjatë marrjes në pyetje në polici, ai ka pranuar autorësinë e krimit, ndërsa është shprehur se gjithçka ka ndodhur nga xhelozia dhe se ishte i bindur që e shoqja e kishte tradhtuar. “Gruaja e kishte mbushur kupën. Ajo më ka tradhtuar gjithë jetën, ndërsa më bënte skena xhelozie. Nuk mund ta duroja dot më, pasi më ngrinte nervat dhe më acaronte sa herë më pyeste se ku isha e me kë isha”, është shprehur autori i krimit. Nga ana tjetër, të afërmit thonë se është e kundërta ishte burri që e kishte tradhtuar gruan, ndaj kishin debate të vazhdueshme.
Në foto: Viktima Shazivare Dervishi, 68 vjeç
