Kreu i SPAK, Altin Dumani zhvilloi ditën e sotme një takim informues me gazetarët.
Në fokus të fjalës së tij ishte krimi zgjedhor dhe ecuria e hetimeve lidhur me shkeljet e raportuara gjatë fushatave elektorale.
Ai theksoi se janë administruar gjithsej 193 materiale, prej të cilave, 56 kallëzime janë bërë nga subjektet politike.
“Janë administruar gjithsej 193 materiale, prej të cilave, 56 kallëzime janë bërë nga subjektet politike, 1 nga Shërbimi i Kontrollit të Brendshëm në burgje, 35 nga Policia e Shtetit dhe 10 çështje janë nisur kryesisht nga vetë SPAK.
Si rezultat, janë regjistruar 43 procedime penale, ndërsa 39 prej tyre mbeten ende nën hetim. Janë lëshuar gjithashtu 17 urdhra kontrolli për banesa, zyra dhe persona, të cilat kanë dhënë rezultate të kënaqshme, duke sjellë në dorëzim prova të rëndësishme.
Nga 43 vendime për mosfillim hetimi, vetëm 3 janë ankimuar në gjykatë, por të gjitha janë rrëzuar, duke konfirmuar vendimet e SPAK”, shprehet Dumani.
