Viti 2023 shënoi rritje të krimeve seksuale ndaj të miturve në të gjithë vendin.
Referuar statistikave të siguruara nga Policia e Shtetit në vitin që lamë pas, në të gjithë vendin janë referuar në prokurori 181 raste ose 12 më shumë se viti 2022.
Tirana dhe Vlora janë qytetet me më shumë raste të referuara, ndërsa më pak krime të kësaj kategorie janë evidentuar në Kukës.
Për të parandaluar shtimin e krimeve seksuale janë propozuar dhe disa ndryshime në Kodin Penal, që sipas juristëve duhen aplikuar sa më parë, pasi vetëm përmes ashpërsimit të dënimeve mund të frenohet ky fenomen.
“Duhet ndërgjegjësuar e gjithë shoqëria dhe mbarë opinioni publik pasi kohët e fundit janë shtuar shumë këto raste. Sa më shumë mund të jetë i ashpër dënimi, aq më shumë frikë duhet të ketë individi që mos ta kryejë dhe të mos e ndërmarrë këtë lloj nisme. Ashpërsimi i dënimit nuk bëhet për të dënuar, por për të parandaluar”,tha avokatja Alesia Balliu.
Ekspertët gjithashtu mendojnë se shkak i regjistrimit të numrit të lartë të krimeve seksuale ndaj të miturve janë edhe politikat e buta penale që ndjek vendi ynë ndaj këtyre krimeve.
Konstatim ky që mbështet edhe në ngjarjet e këtij fillim viti ku rastet e abuzimit seksual më të miturit kanë qenë jo të pakta./tvklan
