Kreu i SPAK, Altin Dumani teksa po raporton në Kuvend për raportin e SPAK për vitin 2023, ka thënë se krimet me natyrë korruptive janë shumë të vështira për t’u hetuar pasi kryhen nga persona në detyrë, intelektualë.
Ndër të tjera, ai theksoi se intelektualët para se të kryejnë krimin përpiqen të fshehin gjurmët apo shfrytëzojnë hapësirat ligjore me qëllim kryerjen e tij.
”Si drejtues kam ofruar ndihmën time duke krijuar grup hetimor, duke shtuar numrin e hetuesve për çështjen konkrete. Gjatë 2023-shit ka pasur ecuri. Hetimi i çështjeve nuk është aq i thjeshtë sa prezantohet. Hetimi është i vështirë, sidomos kur vjen puna tek çështjet me natyrë korruptive.
Krimet e natyrës korruptive janë krimet më të vështira për t’u hetuar sepse është një krim në detyrë, një krim intelektual dhe intelektuali para se të bëjë krimin, përpiqet që të fshehë dhe gjurmët e tij apo shfrytëzon hapësirat ligjore me qëllim kryerjen e krimit. E njëjta logjikë edhe për grupet e krimit të organizuar dhe hetimi i tyre paraqet vështirësi”, u shpreh Dumani.
