Prokuroria e Krimeve të Rënda ka nisur një letërporosi drejt autoriteteve në Shtetet e Bashkuara të Amerikës në të cilën ka ngritur disa pyetje në kuadër të hetimit që po zhvillon për për ish-kryeprokurorin Adriatik Llalla.
Dy pyetjet kryesore që përmban letërporosia janë për shumën e parave që ka paguar Llalla për lindjen e djalit të tij në SHBA dhe gjithashtu informacion në lidhje me pagesën prej 10 mijë dollarësh që dyshohet se Llalla i ka paguar një kompanie në SHBA për të lobuar që ai të hiqet nga lista e personave të padëshiruar në Amerikë.
Të dhënat e bëra publike nga Dhoma e Përfaqësuesve në Kongresin e Shteteve të Bashkuara të Amerikës, zbulojnë se ish-Prokurori i Përgjithshëm, Adriatik Llalla shpenzoi rreth 10 mijë dollarë në shërbime lobimi gjatë tremujorit të parë të vitit 2019.
Akuza ndaj Llallës përfshin veprat penale “refuzim për deklarim, mosdeklarim, fshehje ose deklarim i rremë i pasurisë, interesave private të të zgjedhurve dhe nëpunësve publikë”, “mosdeklarim të shumave monetare në kufi”, “pastrim të produkteve të veprës penale” dhe “shpërdorim detyre”.
Në 1 prill, Gjykata për Krime të Rënda hodhi poshtë një ankesë të Llallës, i cili kundërshtonte vendimin e Prokurorisë për Krime të Rënda për zgjatjen me tre muaj të hetimeve ndaj tij. /Opinion.al
