Kandidatja demokrate për deputete Albana Vokshi këtë të mërkurë ka paditur në SPAK kryeministrin Rama, kryebashkiakun Erion Veliaj, ministren e Shëndetësisë Ogerta Manastirliu dhe deputetin socialist Ulsi Manja.
Kjo padi ndaj është ngritur, pasi sipas Vokshit, në disa rrugë të njësisë 9, është hedhur asfalt të cilin ajo e ka cilësuar “elektoral”, duke mbyllur kanalizimet dhe duke rrezikuar përmbytjen e shtëpive dhe të rrugëve.
Ajo thekson se Kodi Zgjedhor i ndalon punime të tilla gjatë fushatës ndërsa qytetarët e kanë kuptuar se ky asfalt elektoral nuk u përmirëson jetesën, por siç thanë edhe banorët, ka sjellë më shumë probleme nga bllokimi i kanalizimeve.
“Ky është një krim elektoral. Pas 8 vjetësh qeverisje të dështuar të Edi Ramës, qytetarët e kanë kuptuar se ky asfalt elektoral nuk u përmirëson jetesën, por siç thanë edhe banorët, ka sjellë më shumë probleme nga bllokimi i kanalizimeve. Ftoj SPAK të hetojë pa vonesë këtë shkelje të ligjit, që dënohet nga 1-5 vjet burg”, tha Albana Vokshi.
Më tej ajo theksoi “Ftoj qytetarët që më 25 prill të dalin e të votojnë për ndryshimin, në mënyrë që çdo abuzues, duke nisur nga Edi Rama, Ogerta Manastirliu, Erion Veliaj dhe kushdo të shkojnë para drejtësisë”, u shpreh Albana Vokshi./Opinion.al
