Kontrata me kompaninë “ALEAT” do të përfundojë, pasaportat dhe kartat e identitetit do t’i kalojnë sërish shtetit.
Qeveria ka miratuar vendimin për krijimin e një kompanie publike që do të menaxhojë prodhimin dhe shpërndarjen e dokumenteve biometrike.
Pronësia do ti kalojë Ministrisë së Brendshëm dhe do të ketë kapital fillestar prej 20 milionë lekësh, apo rreth 172 mijë eurosh.
Shteti do të trashëgojë nga ALEAT të gjitha pasuritë e saj në 109 pika në të gjithë vendin, së bashku me punonjësit dhe programet kompjuterike.
Kontrata me “ALEAT” skadon këtë vit pas 16 vitesh operim që nga viti 2008. Kjo kontratë ka qenë një nga më fitimprurëset në vendin tonë, duke arkëtuar rreth 400 milionë euro gjatë këtyre viteve.
ALEAT realizoi një fitim prej 2.6 miliardë lekësh, vetëm vitin e kaluar.
