Krijohet si pjesë e Forcave të Armatosura, Komanda e Kibernetikës dhe e Ndërlidhjes.
Për këtë rast u zhvillua edhe një ceremoni zyrtare ku mori pjesë ministri i Mbrojtjes, Pirro Vengu, e ngarkuara me Punë të SHBA-ve në vendin tonë, Nancy VanHorn si dhe përfaqësues të ushtrisë shqiptare dhe amerikane.
Gjatë fjalës së tij ministri i Mbrojtjes, Vengu u shpreh:
“Mbrojtja kibernetike është pjesë e domaineve të luftës dhe është një zgjerim i terrenit të luftës dhe komponent kyç në platformat dhe politikat e NATO-s dhe vendeve aleate”, tha ministri Vengu.
Komanda do të ketë një qasje inovative dhe proaktive, njoftoi ministri, ndërsa pjesë e saj do të jenë rreth 40% ekspertë civilë në fushën e kibernetikës.
Shefi i Shtabit të Përgjithshëm të Forcave të Armatosura, Arben Kingji, theksoi se komanda vjen si “domosdoshmëri për ruajtjen e integritetit të infrastrukturës së komunikimit të Forcave të Armatosura, reagim të shpejtë dhe ndërveprim të sigurt si në nivel kombëtar dhe ndaj aleatëve partnere”.
Kjo komandë do të drejtohet nga gjeneral brigade, Hamdi Doda.
