Zëvendëskryeministrja, njëherësh Ministre e Infrastrukturës dhe Energjisë, Belinda Balluku ka nënshkruar marrëveshjen mes Korporatës Elektroenergjetike Shqiptare (KESH) dhe gjigandit energjitik të Emirateve të Bashkuara, Masdar, për krijimin e kompanisë së përbashkët publike që do të investojë në Shqipëri dhe në rajon.
Lajmi është bërë i ditur nga kryeministri Edi Rama përmes një postimi në rrjete sociale.
Rama shkruan se gjatë takimit ata kanë folur për ecurinë e projekteve të përbashkëta të cilat po hyjnë në fazën e zbatimit.
“Baku, Azerbajxhan – Në mjediset COP29, u nënshkrua marrëveshja e Korporatës Elektroenergjetike Shqiptare(KESH) dhe gjigandit energjitik të Emirateve të Bashkuara, Masdar, për krijimin e kompanisë së përbashkët publike që do të investojë në Shqipëri e në rajon”, shkruan Rama.
Balluku ndodhet në Azerbajxhan në kuadër të Samitit të Klimës COP29 së bashku me ministren e Turizmit dhe Mjedisit, Mirela Kumbaro.
Gjithashtu në këtë samit merr pjesë edhe Kryeministri Rama, i cili më herët është takuar me Presidentin e Emirateve të Bashkuara, Sheikh Muhammed Bin Zayed gjatë vizitës në Baku./Opinion.al
