Në ditën e fundit të muajit të Ramazanit, kreu i Komitetit Mysliman të Shqipërisë Bujar Spahiu ka bërë një urim për të gjithë besimtarët dhe një apel për sa më shumë solidaritet.
“Bajrami është ditë shprese” thotë Spahiu dhe kjo ditë duhet të shërbejë për të sheshuar keqkuptimet, për të falur e toleruar. Kreu i myslimanëve i fton të gjithë shqiptarët ta gëzojnë këtë festë me familjet e të dashurit dhe bën thirrje për vëmendje ndaj të afërmve.
“Le të shërbejnë këto ditë feste për më shumë mirësi, vëllazëri, miqësi dhe dashuri, në të mirë të shoqërisë, kombit dhe gjithë njerëzimit” thotë në fund të fjalës së tij Saphiu.
Urimi i plotë i kreut të Komitetit Mysliman të Shqipërisë
“Fitër Bajrami është ditë shprese, ditë gëzimi dhe solidarizimi. Bajrami është ftesa nga zemra në zemër, për të folur më shumë me njëri-tjetrin, për t’u dashur, për të sheshuar keqkuptimet, mosmarrëveshjet, mëritë dhe zënkat, për të falur e toleruar.
Të nderuar besimtarë, ta gëzojmë këtë festë me familjen, farefisin, fqinjët dhe gjithë shoqërinë dhe me shpresën te Zoti që ky muaj të na ketë bërë më të mirë, më afër krijuesit e njerëzve.
Gjatë këtyre ditëve të mos mungojë vëmendja jonë ndaj fëmijëve, prindërve, të moshuarve, të sëmurëve dhe shtresës në nevojë. Le të heshtim në vend të fjalës së keqe, e kur të flasim, të flasim bukur.
Le të shërbejnë këto ditë feste për më shumë mirësi, vëllazëri, miqësi dhe dashuri, në të mirë të shoqërisë, kombit dhe gjithë njerëzimit. Zoti ju dhëntë mirësi e begati dhe ua pranoftë agjërimin e adhurimet që keni kryer gjatë muajit të bekuar të Ramazanit”. /Opinion.al
