Kreu i sektit fetar që ka qenë në qendër të shpërthimit të koronavirusit në Korenë e Jugut i ka kërkuar falje kombit për përhapjen e sëmundjes.
Lee Man-hee, udhëheqësi i Kishës Shincheonji të Jezusit, u ul në gjunjë dhe u përkul në një konferencë shtypi.
Rreth 60% e më shumë se 4,000 rasteve të konfirmuara në Korenë e Jugut janë anëtare të këtij sekti.
Të hënën, Koreja e Jugut, vendi me përhapjen më të madhe të virusit jashtë Kinës, raportoi 476 raste të reja, duke e çuar numrin e përgjithshëm në 4.212 dhe janë regjistruar 26 vdekje.
Prokurorëve u është kërkuar të hetojnë zotin Lee për akuzat e mundshme të pakujdesisë së rëndë.
“Megjithëse nuk ishte qëllim, shumë njerëz janë infektuar”, tha drejtuesi 88-vjeçar. “Ne kemi bërë përpjekjet tona maksimale, por nuk kemi qenë në gjendje t’i parandalojmë të gjitha.”
Anëtarët e grupit ekstremist të krishterë besohet se kanë infektuar njëri-tjetrin dhe më pas kanë udhëtuar në të gjithë vendin, me sa duket të pazbuluar.
Grupi është akuzuar se mban të fshehtë emrat e anëtarëve të tij, duke e bërë më të vështirë për të ndjekur shpërthimin.
Por zëdhënësi i kishës Kim Shin-chang tha për BBC se ata kishin siguruar një listë të anëtarëve, studentëve dhe ndërtesave për autoritetet.
“Ne ishim të shqetësuar për lëshimin e këtij informacioni për shkak të sigurisë së anëtarëve tanë,” tha Kim.
Udhëheqësi Lee pretendon se ai është ardhja e dytë e Jezu Krishtit dhe identifikohet si “pastori i premtuar” i përmendur në Bibël i cili do të marrë 144,000 njerëz në parajsë me të.
Kisha Shincheonji është etiketuar si një kult brenda Koresë së Jugut dhe gjithashtu në komunitetin e krishterë, gjë që rezulton që grupi shpesh diskriminohet, persekutohet ose kritikohet, tha Kim për BBC. /Opinion.al
