Komisioni Qendror i Zgjedhjeve i zgjedhuri i PD Klement Zguri doli në një deklaratë për mediat mesditën e sotme dhe u bëri thirrje politikanëve të zbatojnë heshjen zgjedhore. Reagimi i tij vjen pas deklaratës së fortë të Metës nga Lezha, deklaratave të Luan Ramës nga selia e LSI dhe deklarateve të PS publikuar në formën e njoftimeve për shtyp.
Gjithashtu ai u bëri thirrje komisionerëve të jenë gjakftohtë dhe të mos shkelin ligjin.
“U bëj thirrje komisionerëve dhe thirrja ime është e drejtpërdrejtë për ta dhe u kujtoj që ligji elektoral dhe Kodi Zgjedhor parashikon ndëshkime të rënda për çdo person që cenon procesin zgjedhor”, tha ai.
Mesazhi i dytë ishte për qytetarët dhe institucionet ligjzbatuese.
“Jam këtu për tu bërë thirrje qytetarëve që të shmangin incidentet që kanë lidhje me mbarëvajtjen e procesit zgjedhor. U bëj thirrje institucioneve që të ndjekin dhe marrin masa për të garantuar proces të lirë, të ndershëm dhe transparent”, deklaroi ai.
Mesazhi i fundit i kreut të KQZ-së ishte ajo drejtuar klasës politike.
“Liderët politikë të respektojnë ligjin, përkatësisht nenin 77-të të Kodit Zgjedhor, ku thuhet se heshtja zgjedhore respektohet deri në orën 19:00”, deklaroi ai.
Zguri tha se KQZ garanton të gjithë zgjedhësit dhe qytetarët se procesi ndiqet hap pas hapi nga ky institucion në rang vendi.
Deklaratë e plotë Kryetarit të KQZ-së, Klement Zguri
Tashmë kanë kaluar 8 orë nga nisja e procesit të votimit, jam këtu para jush për t’u bërë thirrje komisionerëve të niveleve të dyta dhe të treta që të kryejnë detyrat e tyre në zbatim të ligjit për administrimin e procesit zgjedhor.
Thirjja është e drejtpërdrejtë për ta dhe u kujtoj që ligji elektoral dhe ndryshimet e fundit në Kodin Penal, parashikojnë sanksione të rënda për çdo person që cënon administrimin normal të procesit zgjedhor.
Ky është momenti i qytetarëve që të shprehin lirisht vullnetin e tyre, në respekt të ligjit, i cili garanton votën e tyre. Jam këtu për tu bërë thirrje qytetarëve të qëndrojnë larg çdo lloj incidenti të mundshëm, që ka lidhje me mbarëvajtjen e procesit zgjedhor.
U bëj thirrje institucioneve ligjzbatuese, të ndjekin hap pas hapi dhe të marrin masa parandaluese për të garantuar një proces zgjedhor të lirë, të ndershëm dhe transparent.
KQZ është e vendosut të zbatojë Kushtetutën, ligjin elektoral dhe i garanton zgjedhësit se procesi po monitorohet hap pas hapi, në të gjithë vendin.
U bëj thirrje po ashtu liderëve politik, të respektojnë ligjin, pikërisht nenin 77 të Kodit Zgjedhor, ku thuhet se heshtja zgjedhorevijon deri në orën e mbylljes së votimit, ekzaktësisht në orën 19:00.
