Çelo Hoxha, kryetari i sapozgjedhur i Institutit për Studimin e Krimeve të Komunizmit në Shqipëri, ka reaguar në lidhje me vendimin e Bashkisë së Dibrës për të nderuar me titullin “Nderi i Qarkut Dibër” ish-kreun e presidiumit të Kuvendit Popullor Haxhi Lleshin.
Hoxha shprehet në reagimin e tij Haxhi Lleshi ka kryer krime gjatë periudhës së komunizmit. Ai shton se Lleshi ka firmosur ekzekutimin e të dënuarve politikë.
“Haxhi Lleshi përfshihet në listën e përpiluar nga Instituti i Studimit të Krimeve dhe Pasojave të Komunizmit, që përmbledh pjesëmarrësit që kanë përgjegjësi direkte për krimet e Partisë Komuniste Shqiptare dhe të Ushtrisë Nacionalçlirimtare. Në vitin 1995 me dekret të Presidentit të Republikës, Haxhi Lleshit iu hoqën të gjitha dekoratat dhe titujt e nderit për aktin kriminal të gjenocidit të ushtruar ndaj popullit shqiptar gjatë viteve të diktaturës komuniste”, tha Çelo Hoxha.
Lidhur me nderimin e Haxhi Lleshit me titullin “Nderi i Qarkut Dibër” ka reaguar edhe ish-kreu i Institutit për Studimin e Krimeve dhe Pasojave të Komunizmit, Agron Tufa, i cili e cilëson atë si tiranozaur të komunizmit ndërsa vendimin e Bashkisë e konsideron grotest dhe përpjekje të Rilindjes për restaurimin e rekuizitës komuniste.
“Tragjikomik, grotesk, turpërues e anakronik akti i dhënies së titullit “Qytetar nderi” për tiranozaurin e komunizmit Haxhi Lleshin nga bashkia e Peshkopisë! Haxhi Lleshi, ish-vegël e komunistëve serbo-jugosllavë gjatë luftës së ashtuquajtur NÇL dhe Kryetar i Kuvendit Popullor gjatë regjimit enverist, duhej të ishte kandidati i parë për “Qytetar turpi!”. Po si duket, epoka e Rilindjes po na e restauron tërësisht rekuizitën komuniste të diktatorit Enver Hoxha! Bravo! Kështu shkohet drejt BE dhe vlerave të saj! O turp, ku e ke skuqjen!”, shkruan Tufa./ Opinion.al
