Ka nisur seanca plenare e ditës së enjte, ku fjalën e ka marrë fillimisht Edi Paloka, kreu i grupit të PD-së. Paloka tha se pas disa ditësh do të dalë një raport, në të cilin ka informacione se ‘krerët e policisë urdhërojnë efektivët që të ruajnë parcelat me kanabis’.
Paloka i ka kërkuar Kuvendit, që ky raport menjëherë pas publikimit t’i vihet në dispozicion Komisionit të Sigurisë dhe Presidentit.
“Sipas informacioneve jo nga ministria e Tahirit, por nga persona që po merren specifikisht me fotografimin e fushave me kanabis, brenda pak ditëve do të paraqitet raporti për sasitë e mbjella me kanabis në territorin e Shqipërisë. Nga këto informacione, gjendja është më shumë se katastrofike.
Këta rrezikojnë ta fusin Shqipërinë në listat më të zeza që kanë ekzistuar ndonjëherë. Sipas informacioneve që na vijnë nga shërbimet që po merren
me këtë çështje. Po nga këto informacione rezulton se nuk janë vetëm trafikantët që e kryejnë këtë aktivitet, por është vetë policia e Shtetit e
implikuar në këtë gjë.
Janë pothuajse të gjithë drejtorët e policisë të implikuar direkt që detyrojnë punonjësit e policisë të ruajnë arat e mbjella me kanabis. U raportuan nja dy policë, po ata nuk çonin pjesë e tyre te shefat. Pas pak ditësh do ta keni në raport zyrtar. Ndaj këtu hyjnë bandat në mes të ditës në aeroport, se këtu nuk ka siguri, se forcat e policisë po ruajnë parcelat me kanabis. Atëherë na thonin Lazarat, Lazarat, se mbillej veç aty. Por tani është mbjellë kudo, veç në Lazarat jo. Janë miliarda që mbillen nga pushtetarët. Shkojnë ja numërojnë rrënjët, e i bëjnë llogaritë. Kaq ju bën fitimi, kaq do më jepni mua. Janë miliarda, që për çfarë i mbledhin, për çfarë i duan, nuk dihen ende. Janë para që blihen gjera, blihen edhe takime me presidentin e SHBA.
Do doja që raporti që do dalë pas disa ditësh, t’i vihet në dispozicion në mënyrë urgjente Komisionit të Sigurisë dhe t’i vihet në dispozicion edhe
presidentit”, tha Paloka.
