Plot 24 mijë tifozë kanë qenë në “Stade Velodrome” mbrëmjen e djeshme, në mbështetje të kombëtares, e cila për afro 90 minuta ka qëndruar heroike dhe e barabartë me gjigandët e Europës, sikurse është Franca, 2 herë kampione Bote dhe dy herë kampione Europe.
I ashtuquajturi “lojtari i 12-të” është shfaqur në lartësinë e kërkuar në finalet e “Euro 2016”, larg dhunës, duke rrezatuar kulturë e qytetari. Qytetet ku ka luajtur Shqipëria në dy ndeshjet e para të Grupit A, Lens dhe Marsejë, janë veshur kuqezi ditët e ndeshjeve, ndërsa dje nuk mungoi as shpalosja e një flamuri gjigand, 150 me 70 metra, në bregdetin e Marsejës, duke i treguar botës se sa pasionantë, por brenda caqeve, janë mbështetësit e kombëtares shqiptare.
Kamerat dhe regjia ndërkombëtare ka fokusuar një tifoz shqiptar, që fytyrën e kishte kthyer në shqiponjë, duke mbajtur kokën me duar dhe duke qarë. Si ai, me siguri kanë qenë duke qarë edhe mijëra shqiptarë të tjerë, anembanë botës, nga hidhërimi, por ama krenaria nuk zhbëhet, as paraqitja tejet dinjitoze e kombëtares ndaj francezëve. Gjë të cilën e ka nënvizuar edhe UEFA, në komentin “ekspres” pas ndeshjes: “Shqipëria, zemra nuk mungon. Antoine Griezmann dhe Dimitri Payet shënojnë golat në finale dhe Franca fluturon për në 1/8 e “Euro 2016”, me një tur përpara”.
