Teksa lufta në Ukrainë ka hyrë në ditën e 26-të, Kremlini ka bërë një sërë deklaratash në një konferencë për shtyp.
Kështu, sipas Rusisë, vendet që kanë ndikim mbi Kievin duhet ta përdorin atë për ta bërë Ukrainën “më konstruktive” në bisedimet e paqes.
Sky news raporton se Kremlini po ashtu ka thënë se bisedimet me Ukrainën nuk janë aq progresive sa dëshiron Rusia. Sipas Moskës, rusët po shtojnë përpjekjet për të punuar më shpejt në negociata, por nuk ka “asnjë bazë” për një takim të mundshëm midis presidentit rus Vladimir Putin dhe liderit ukrainas Volodymyr Zelensky.
Pretendimet se Rusia nuk po i lejon civilët ukrainas të evakuohen janë “gënjeshtra”, ka thënë gjithashtu Kremlini.
“Në vend të kësaj, nacionalistët në Ukrainë po i ndalojnë civilët të ikin përmes korridoreve humanitare dhe duhet të bëhet presion mbi Kiev për ta zgjidhur këtë çështje”, thotë Kremlini, ndërsa shton se “një embargo e naftës do të godiste balancën energjetike në Europë, ndërsa Shtetet e Bashkuara nuk do të humbisnin asgjë”./Opinion.al
