Me një rritje të ndjeshme të eksporteve dhe rritje të aksesit në financim, disa nga sektorët më dinamikë të ekonomisë shqiptare po përfitojnë më shumë se kurrë nga kreditë bankare.
Referuar shifrave të Bankës së Shqipërisë, kredia për ndërmarrjet e përpunimit u rrit me 13.6% ashtu sikundër ajo për tregtinë me shumicë e pakicë në masën 13.4%.
Por a është kjo një formulë suksesi apo një modeli që varet nga huaja bankare?“Modeli i bizneseve shqiptare është i atillë që mban të pashpërndarë fitimin e tyre dhe mbështet tek kredia për investim apo zgjerim në tregje të tjera. Prodhimi tashmë e ka marrë veten nga dëmi që shkaktoi dobësimi i Euros ndihmuar nga situata gjeopolitike në Europë dhe kërkesa për më shumë produkte është rritur”, shprehet eksperti i ekonomisë Elvin Meka.
Ekspertët sugjerojnë se për të ruajtur këtë rritje, është e domosdoshme që kreditimi të shoqërohet me politika afatgjata dhe ulje risku në sektorët më të ekspozuar.
“Planet e bizneseve duhet të orientohen në mënyrë të atillë që të mos krijojnë varësi vetëm nga kredia, por të ndjekin investimet në tituj borxhi. Nga ana tjetër ekziston gjithashtu riorganizimi i vazhdueshëm i tregtisë globale nga tarifat e reja çka mund të ndikojë si çmimet dhe zinxhirët e furnizimit”, thotë Meka.
Referuar INSTAT kërkesa e jashtme për veshje dhe këpucë shqiptare ka nisur të rigjallërohet. Vitin e kaluar, eksportet e këtij grupi pësuan rënie vjetore me 17%, ndërkohë që në 3 muajt e parë të vitit 2025 rënia u zbut në rreth 5%.
Tv Klan
