Teksa Komisioni Qendror i Zgjedhjeve po punon për zëvendësimin e deputetëve të opozitës, paralelisht po organizon edhe zgjedhjet lokale të 30 qershorit. Në një deklaratë për mediat, zëdhënësja e këtij institucioni i kërkoi partive politike që të dorëzojnë brenda ditës së sotme emrat e komisionerëve të tyre pranë KZAZ-ve, pasi vonesat cenojnë procesin zgjedhor.
“KQZ kërkon që partitë politike të mos neglizhojnë afatet për administratën zgjedhore. Tregon mungesë përgjegjshmërie në lidhje me Kodin Zgjedhor. KQZ është e vendosur të mos tolerojë vonesat në propozime”, është shprehur zëdhënësja e këtij institucioni.
Partia Socialiste iu përgjigj me Taulant Ballën ftesës së KQZ-së, i cili tha se propozimet e kësaj partie do të dërgohen sot, ndërsa ende nuk ka një përgjigje nga opozita./Opinion.al
