Komisioni Qendror i Zgjedhjeve ka rrëzuar kërkesën e PDIU për rinumërim të kutive në në gjithë qarkun e Tiranës.
Kërkesa e PDIU për rinumërim u rrëzua me 6 vota nga KQZ, ndërsa përfaqësuesi i PS, Saliani tha se kërkesa e PDIU është e pabazuar në ligj. Ndërkohë përfaqësuesi i LSI tha se në 60 qendra kishte probleme me tabelat.
Komisioni Qendror i Zgjedhjeve rinumëroi sot 64 kuti votimi të Qarkut të Tiranës të kontestuara nga PDIU dhe Partia Socialiste, nga të cilat rezultoi se kreut të PDIU-së, Shpëtim Idrizi nuk i takon mandati i deputetit. Partia Socialiste arrin të ruajë mandatin e 18-të në Tiranë.
“Beteja” votë për votë në secilën kuti u zhvillua për shkak se PDIU pretendonte se e kishte fituar mandatin e Idrizit që ka humbur për 37 vota, por nga rinumërimi rezultoi se ai ka marrë 5 vota më shumë se në 25 qershor.
Sipas përfaqësuesit ligjor të PDIU, Erion Manohasa numërimi i kutive ka vërtetuar pretendimet për deformim të votës dhe për këtë arsye depozitoi kërkesë në KQZ për rinumërim të gjithë kutive të Tiranës.
