Nëse 4 vite më parë u futën në zgjedhje dhe garuan 68 subjekte politike këtë vit lista është tkurrur shumë. Në garë janë 15 parti dhe lista nis me Partinë Komuniste.
Ndërsa Lulzim Basha, lideri i opozitës deklaronte nga çadra në Bulevard se më 18 Qershor moralisht dhe politikisht nuk ka zgjedhje, në Komisionin Qendror të Zgjedhjeve miratohej lista e partive që garojnë për më 18 Qershor 2017.
Përpos PD-së dhe aleatëve që janë deklaruar publikisht se nuk shkojnë në zgjedhje duket se zgjedhjeve më 18 Qershor u kanë ikur edhe shumë parti të tjera të vogla.
“Bazuar në nenin 67, pika 1 dhe pika 2 të Kodit Zgjedhor, 17 (pesëmbëdhjetë) parti politike të regjistruara si subjekte zgjedhore në KQZ, depozituan kërkesat për regjistrim e listave shumë-emërore për kandidat për deputet”, njoftoi KQZ-ja.
Renditja në fletën e votimit e subjekteve zgjedhore do të bëhet sipas numrit rendor të dalë nga rezultati i shortit për partitë politike.
Partitë që do marrin pjesë në zgjedhje
1 Partia Komuniste e Shqipërisë
2 Sfida për Shqipërinë
3 Partia Minoriteti Etnik Grek për të Ardhmen
4 Partia Lista e Barabartë
5 Aleanca Popullore për Drejtësi
6 Partia Demokracia Sociale
7 Partia Aleanca Demokratike
8 Partia Kristian-Demokrate
9 Lëvizja Socialiste për Integrim
10 Partia Aleanca Arbnore Kombëtare
11 Partia për Drejtësi Integrim Unitet
12 Partia Social Demokrate
13 Partia Socialiste
14 Fryma e re Demokratike
15 Partia Aleanca Demokristiane
Braktisja e mbledhjes nga të djathtët
Gjatë mbledhjes së sotme të KQZ pati debate dhe të djathtët u larguan nga mbledhja. Sipas tyre, disa subjekte zgjedhore kishin parregullsi mes nënshkrimeve mbështetëse në lista dhe atyre të vendosura në kopjet e kartave të identitetit për kandidatët. Kryetari i KQZ Denar Biba refuzoi të kryejë këtë procedurë dhe e rrëzoi kërkesën e të djathtëve.
“Ne si anëtarë të KQZ-se, shprehim shqetësimin se kjo sjellje e KQZ-se po cenon rëndë procesin zgjedhor dhe po inkurajon dhe hap rrugën manipulimeve zgjedhore”, thonë anëtarët e djathtë të KQZ-së, Hysen Osmanaj (Zv/Kryetar i KQZ-se), Vera Shtjefni dhe Klement Zguri.
Fletët e votimit do të prodhohen në Greqi
Fletët e votimit do të prodhohen në Greqi nga kompania ‘Inform Lykos’. Kjo fletë votimi do të ketë 5 elementë sigurie, dhe do të renditen 15 parti. Kosto e një flete votimi është 12.3 lekë (pa TVSH) dhe fleta për të verbrit 270 lekë.
Kjo është hera e parë që fletët e votimit shtypen në Greqi pasi më parë ato printoheshin në Slloveni, Itali e Shqipëri.
/Opinion.al
