KQZ: Dyshime për formularin e Rroshit e Bushit, të hetojë prokuroria

Komisioni Qendror i Zgjedhjeve vendosi të enjten t’ia kalojë Prokurorisë së Përgjithshme ‘për kontroll të thelluar’ verifikimin e të dhënave të pasqyruara në formularin e vetëdeklarimit të kryetarit të Bashkisë Kavajë, Elvis Roshi dhe të kryetarit të Bashkisë Krujë, Artur Bushi, në kuadër të ligjit të dekriminalizimit.
KQZ u mblodh të enjten për të diskutuar verifikimin e deklarimeve në formularin e vetëdeklarimit të dy kryebashkiakëve, pas kërkesës së organit qendror të akuzës.
Sipas relacionit që shoqëron pr/vendimin nga verifikimi i dokumentacionit (të të dhënave në formularin e vetëdeklarimit dhe vërtetimit të gjendjes gjyqësore), rezulton se rrethanat e paraqitura nga kryebashkiakët Roshi dhe Bushi janë të paqarta nëse ato përfshihen apo jo brenda sferës së ndalimeve për shpalljen e pavlefshmërisë së mandatit dhe ndërprerjen e mandatit.
“Referuar të dhënave për ndalimet, masat e sigurimit personal dhe hetimet jashtë vendit këto janë të paqarta dhe KQZ nuk mund të vlerësojë nëse funksionari është në kushtet e ndalimit të parashikuar nga ligji”, argumenton KQZ.
Në këto kushte, referuar vendimit të Kuvendit për aktet nënligjore, KQZ duhet t’ia kaloj rastin për kontroll të thelluar Prokurorisë së Përgjithshme brenda 5 ditëve.
Pak jave me pare Prokuroria e Përgjithshme i kërkoi KQZ-së verifikimin e të dhënave të deklaruara në formularin e vetëdeklarimit të Elvis Roshit dhe Artur Bushit.