Vendimet e institucioneve të vettingut për gjyqtarët dhe prokurorët kanë qenë shkarkim ose konfirmim në detyrë, por vendimi i sotëm i KPK për kreun e Prokurorisë së Apelit Shkodër është i paprecedentë.
Elvin Goka është pezulluar sot nga detyra me vendim të Komisionit të Pavarur të Kualifikimit por, siç raporton BIRN, ndaj tij është vendosur masa disiplinore “edukim i detyrueshëm” e cila është e parashikuar në nenin Ë të Kushtetutës për mangësitë profesionale
Gjatë seancës dëgjimore, KPK konstatoi probleme në shumicën e dosjeve të hetuara nga subjekti dhe që u bënë pjesë e rivlerësimit. Ndaj tij gjithashtu kishte një denoncim kur drejtonte prokurorinë e Elbasanit se “ka ndikuar te prokurorët për caktimin e masave të buta të sigurisë për të dhënë dënime të ulëta”. KPK konstatoi gjithashtu si problem mungesën e pasqyrimit të kontaktit të tij me një shtetas me inicialet E.N, i akuzuar për shpërdorim detyre dhe pastrim të produkteve penale.
Elvin Gokaj e ka nisur karrierën në sistemin e drejtësisë si oficer i policisë gjyqësore. Në vitin 2000 ai është emëruar prokuror në Prokurorinë e Matit, ndërsa në vitet 2007-2013 ka kryer detyrën e drejtuesit të Prokurorisë së Elbasanit. Gokaj është promovuar në Prokurorinë e Apelit të Shkodrës në vitin 2014 dhe prej vitit 2016 ushtron funksionin e drejtuesit të kësaj prokurorie.
Tashmë pas pezullimit nga detyra ai do të ndjekë një trajnim 1-vjeçar në Shkollën e Magjistraturës. /Opinion.al
