Energjia, uji dhe transporti në Shqipëri janë ndër më të lirat në rajon. Duke iu referuar të dhënave, Kosova qëndron në vend të parë për koston më të ulët të jetesës.
Për pagesën e ujit dhe dritave, shpenzimet mujore janë 83 Euro, vetëm 2 Euro më pak se Shqipëria që e ka mestarisht 85 Euro në muaj. Megjithatë bileta për transport publik kushton mesatarisht 40 Lekë, apo e thënë ndryshe 0.40 Cent. Në Kosovë transporti publik kushton nga 50 Cent deri në 1 Euro.
Në Mal të Zi, energjia, uji dhe transporti sërish kushtojnë më shtrenjtë, përkatësisht 110 Euro, dhe 1 Euro bileta e transportit.
Në krahasim me vendet e Europës, kostoja e jetesës në Shqipëri është afërisht 30% më e lirë.
“Kostoja e jetesës në Shqipëri është më e ulët se vendet e Bashkimit Europian. Të dhënat bëhen të ditura nga agjencia ‘Numbeo’ për koston e jetesës në vende të ndryshme të botës”, raporton gazetarja e Tv Klan Erikleda Dorezi.
Në Itali për ujë dhe drita pagesa mesatare është 195 Euro, ato variojnë nga 121 deri në 311 Euro, ndërsa bileta e transportit publik kushton 1.60 Euro.
Duke iu referuar edhe kryeqyteteve, koston më të ulët e ka Prishtina, e ndjekur nga Shkupi, Tirana dhe Podgorica./ Tv Klan
