Vonesat në krijimin e qeverisë në Kosovë pritet të shkaktojnë probleme me buxhetin në vend. Sipas këshilltarit në Ministrinë e Financave, Lulëzim Rafuna në rast se nuk formohet qeveria e re, atëherë që në 1 Mars nuk do të mund të kryhet asnjë pagesë, duke përfshirë është pagat e punonjësve shtetërorë.
“Sa më shpejt që të ketë qeveri është më mirë për vendin dhe për institucionet e tij, ndërsa nuk ka ndonjë afat ligjor se kur duhet të ketë ekzekutiv. Edhe sa i përket buxhetit të Republikës së Kosovës në ligjin për menaxhimin e financave publike nuk ka ndonjë afat ligjor se kur duhet të aprovohet buxheti në qeveri. Me përjashtim të rastit kur ligji për menaxhimin të financave publike parashikon se në situatat kur e kemi një Kuvend të Republikës së Kosovës deri në 31 tetor duhet të aprovohet buxheti, e të shkojë në Parlament. Çështja është se në rastin konkret, ne kemi një situatë shumë ndryshe, se në 31 tetor nuk e kishim Kuvendin për shkak të procesit të zgjedhjeve. Në rast se Kuvendi i Republikës së Kosovës nuk ndërmerr veprime për të nxjerrë një vendim që edhe gjatë muajit mars të implementohet buxheti i vitit 2019, kjo nënkupton se në 1 mars, asnjë pagesë tjetër nuk mund të bëhet me përjashtim të borxhit publik ndërkombëtar”, -thotë këshilltari.
Ai ka shpjeguar se buxheti i vitit 2019 mund të shfrytëzohet vetëm në dy muajt e parë të vitit 2020, më pas në muajin Mars nevojitet një vendim i Kuvendit dhe këtu ka ngërç./Opinion.al/
