Kryeministrit I Kosovës, Albin Kurti së bashku me kryeministrin e Malit të Zi, Dritan Abazoviç kanë zhvilluar një takim gjatë të cilit kanë nënshkruar marrëveshjen për shërbime ajrore mes Kosovës dhe Malit të Zi.
Pas firmosjes së marrëveshjes, Kurti tha se ky është një hap i rëndësishëm dhe i domosdoshëm për rregullimin e hapësirës ajrore mes dy shteteve, pasi sipas tij marrëveshja me Malin e Zi mundëson shkurtimin e rrugëve ajrore e kohës së fluturimit për 15 minuta.
Ndër të tjera ai theksoi mirënjohjen ndaj shtetit malazez, i cili gjatë luftës së fundit në Kosovë u bë strehë e shumë refugjatëve nga Kosova.
“Pata kënaqësinë të mirëpres në takim kryeministrin Abazoviç me të cilin biseduam për marrëdhëniet e mira fqinjësore mes dy vendeve. Mundësitë e mira për dy vendet tona ishin në fokus të këtij takimi. Mali i Zi e njohu Kosovën në vitin 2008. Jemi mirënjohës që në kohëra më të vështira, Mali i Zi u bë strehë për Kosovën për mbi 100 mijë qytetarë të Kosovës që u dëbuan nga regjimi i Millosheviçit.
Qytete të shumta i hapën zemrat, duke i strehuar refugjatët nga Kosova. Sot qytetarët e Kosovës jo vetëm që kanë pushuar në bregdetin e Malit të Zi, por janë edhe investitorë të rëndësishëm, të cilët i kontribuojnë ndërlidhjes ekonomike mes dy vendeve tona. Sot punojmë ngushtë si dy shtete fqinje për të promovuar paqen e sigurinë”, theksoi ai./Opinion.al
