Policia e Kosovës po zhvillon një aksion në të gjithë vendin, ku shënjestër janë personat e përfshirë në veprimtari të kundërligjshme, siç janë trafiku i lëndëve narkotike dhe krimet kibernetike.
Siç raportojnë mediat në Kosovë deri më tani janë arrestuar 10 persona, ndërsa në pranga pritet të përfundojnë edhe të dyshuar të tjerë që ishin objekt i hetimit.
Zëdhënësi i policisë, Baki Kelani njoftoi se operacioni është realizuar me sukses, ndërsa shtoi se ende nuk ka përfunduar.
“Pas një pune operative dhe hetimore, nga zyrtarët e Departamentit të Hetimeve të Policisë së Kosovës (PK), nën autorizimin e Prokurorisë Speciale të Republikës së Kosovës (PSRK), sot në orët e hershme të mëngjesit është realizuar një operacion i suksesshëm policor. Gjatë këtij operacioni policor janë kryer kontrolle në tri rajone të Kosovës që përfshijnë një numër të konsiderueshëm të lokacioneve të ndryshme, kundër trafikimit me narkotikë dhe krimeve kibernetike. Të gjitha veprimet e mëtejme do të ndërmerren në bashkëpunim dhe koordinim me organet e drejtësisë, ku për informacione shtesë mund të informoheni pas përfundimit dhe kompletimit të operacionit”, thuhet në njoftimin e Kelanit.
