Vijon të rritet numri i viktimave dhe i të infektuarve me koronavirus në Kosovë. Mësohet se në 24 orët e fundit kanë humbur jetën 10 persona, ndërsa janë konfirmuar 224 raste të reja me COVID-19.
Sipas Institutit Kombëtar të Shëndetësisë Publike të Kosovës, gjatë 24 orëve të fundit po ashtu janë shëruar 152 persona, duke bërë që në total numri i të shëruarve të arrijë në 4,730.
Numri i vdekjeve arrin në 236, ndërsa numri i përgjithshëm i të infektuarve ka shkuar në 8,554.
Ndërkohë, drejtori i Shërbimit Spitalor dhe Klinik Universitar, Valbon Krasniqi se gjendja klnike e pacientëve me COVID-19 që janë të shtrirë në spitalet rajonale dhe në klinikat e QKUK-së është e rënduar.
Ai tha se numri i përgjithshëm i pacientëve me COVID-19 apo që dyshohet se janë të prekur nga kjo sëmundje, e që janë të shtrirë në QKUK dhe spitalet rajonale është 599. Prej tyre, 257 janë të shtrirë në klinikat e Qendrës Klinike Universitare dhe 342 në spitalet rajonale.
Nga pacientët e shtrirë, 39 janë vënë në respiratorë dhe 15 pacientë janë të intubuar. Ndërkaq, 370 pacientë të tjerë kanë nevojë për trajtim të vazhdueshëm me oksigjenoterapi, njoftoi Krasniqi, duke shtuar se pacientët që po kërkojnë ndihmë, kanë një gjendje të rënduar shëndetësore.
Ministri i Shëndetësisë, Armend Zemaj, tha se duke parë rritjen e rasteve me koronavirus ditëve të fundit, tha se autoritetet do të ashpërsojnë masat për të frenuar përhapjen e mëtejmë të virusit.
