Ekrem Rrahmani wshtw kosovari i parë që do t’i refuzojë letrat e shtetësisë gjermane kancelares gjermane, Angela Merkel. Ai që merret me kultivimin e mjedrës, thotë se synimet i ka të qarta në këtë kulturë bujqësore.
Varfëria e skajshme, papunësia dhe mosperspektiva për të ardhmen ishin faktorët kryesorë që shtynë Ekrem Rrahmanin që së bashku me gruan dhe dy fëmijët të ikin nga Kosova. 27-vjeçari, i cili vjen nga fshati Teneshdollë, komuna e Prishtinës, këtë rrugë e kishte marrë gjatë vitit 2013. Ai kishte emigruar në shtetin austriak, ku kishte qëndruar disa muaj për t’u kthyer në Hungari, ku kishte qëndruar për 6 muaj.
Trajtimi ç’njerëzor në kampet e këtij shteti kishte bërë që me ndihmën e Organizatës Internacionale për Migrim (IOM) të kthehet në mënyrë vullnetare në Kosovë. Rrahmani, së bashku me gruan dhe dy fëmijë, ishte kthyer edhe më i zhgënjyer, edhe pse krejt shpresën e kishte mbështetur te emigrimi. Por, ai mblodhi forcat dhe nuk u dorëzuar përballë sfidave që ia solli jeta. Pasi në posedim kishte tokë prej 90 arësh, kishte vendosur të fillojë punimin e saj. Në mars të vitit 2014 me ndihmën e USAID-it kishte nisur të merrej me kultivimin e mjedrës. Me buzëqeshje në fytyrë, pasi ka siguruar bukën në radhë të parë për fëmijët e pastaj edhe për familjarët e tjerë, Rrahmani thotë se është i kënaqur me punën që po bën. E kemi gjetur veten, unë dhe anëtarët e familjes. Me shitjen e mjedrës që kam vjelë nga 80 arë të mbjella kam qarkulluar gjatë këtij viti rreth 22 mijë euro”, ka shtuar Rrahmani.
Ai për të vjelë dhe punuar këtë rendiment ka angazhuar 3 anëtarë të familjes, të cilët punojnë rregullisht dhe 5 punëtorë tjerë sipas nevojës. Duke parë fitimin dhe rendimentin e bollshëm, që toka i dhuroi me kultivimin e mjedrës, babai i dy fëmijëve, Rrahmani, tani ka synime që të mbjellë me mjedra edhe 90 arë tokë. Ai ka një porosi edhe për kancelaren gjermane, Angela Merkel. “Tash edhe me m’i ofruar letrat e shteteve evropiane nuk i pranoj. Angela Merkel me ardh te arat me më lut merri letrat unë nuk shkoj”, thotë Rrahmani, duke buzëqeshur./zeri
