Në përfundim të mbledhjes së Këshilit të Sigurisë ka dalë në një konferencë shtypi, kryeministri i Kosovës, Albin Kurti.
Kurti ka deklaruar se pas situatës së krijuar me rrëmbimin e 3 efektivëve të policisë nga forcat speciale serbe, ka vendosur të rrisë gjendjen e gatishmërisë.
Kreu i qeverisë së Kosovës po ashtu shprehu habinë e tij në lidhje me heshtjen e autoriteteve ndërkombëtare në lidhje me veprimet e Serbisë që sipas tij kanë për qëllim të destabilizojnë vendin dhe rajonin.
“Diskutuam për veprimin agresor të Policisë së Serbisë që rrëmbeu tre efektivët e policisë së Kosovës. Biseduam për situatën e përgjithshme të sigurisë sidomos në 4 komunat në veri. Rasti i djeshëm ishte agresion dhe hakmarrje ndaj policisë që po lufton krimin. Institucionet tona e kanë rritur nivelin e gatishmërisë. Janë shtrënguar kontrollet kufitare me Serbinë sidomos për automjetet. Kemi rritur kontrollet kufitare dhe mund të ndalohet qarkullimi kur mendohet se mund të përbëjë rrezik. Synimi ynë është siguria dhe ajo nis te kufijtë. Ne edhe njëherë kërkojmë që të lirohen 3 efektivët e policisë. Serbia nuk ka ndryshuar në qëllime, ajo çfarë është e çuditshme është heshtja e ndërkombëtarëve ndaj veprimeve të Serbisë”, tha Albin Kurti./Opinion.al
