Kosova u pranua si anëtare e FIFA-s me të drejta të plota, pasi pak ditë më parë u bë pjesë e UEFA-s. Ky vendim përcakton edhe fundin e izolimit të futbollit kosovar.
Në kongresin e mbajtur në Meksikë u mor vendimi edhe për Gjibraltarin. Përfaqësueset e këtyre vendeve në këtë mënyrë fituan të drejtën për tu përfaqësuar në kualifikueset e Kupës së Botës 2018. Për Kosovën do të jetë një debutim absolut, pasi Gjibraltari mori pjesë në eliminatoret e Euro 2016.
UEFA duhet të marrë një vendim se ku do të luajnë këto përfaqësuese. Grupet H dhe I janë me nga 5 ekipe. Ndeshjet do të nisin në muajin shtator kështu që UEFA duhet të vendosë sa më shpejt. Rivalët nuk janë edhe aq të lehtë, pasi në Grupin H ndodhen Belgjika dhe Bosnje Hercegovina dhe te Grupi I, Kroacia, Islanda apo Turqia.
Pavarësisht rezultatit përfundimtar ky përfaqësim do të mbahet mend si debutimi i Kosovës në arenën ndërkombëtare.
Tv Klan
