Kreu i Partisë Demokratike, Sali Berisha ka kërkuar përjashtimin e Serbisë nga Kupa e Botës, “Katar 2022”, pas shfaqjes së hartës së Kosovës në flamurin serb.
Përmes një postimi në “Facebook”, Berisha ka dënuar po ashtu edhe atë që e cilëson si heshtjen e turpshme të kryeministrit Edi Rama për veprimin e bërë nga ekipi kombëtar i Serbisë.
“Shpërthim racizmi antishqiptar i ekipit të ultranacionalist serb në Katar. Dënoj me ashpërsinë më të madhe këtë akt primitiv të ekipit serbomadh të Beogradit dhe kërkoj përjashtimin e tyre urgjent nga kampionati. Dënoj heshtjen e turpshme të vasalit të Aleksander Vuçiçit, Edi Rama”, shkruan Berisha.
Kujtojmë se, një flamur që i referohej Kosovës ishte varur në dhomën e zhveshjes para se Serbia të luante kundër Brazilit të enjten. Ajo tregonte një hartë të Serbisë e cila përfshinte edhe territorin e Kosovës dhe sloganin “Jo dorëzim”. Banderola ishte vendosur mbi dollapët e Milos Veljkovic dhe Andrija Zivkovic para humbjes së tyre 2-0 ndaj Brazilit.
Ndërkohë, FIFA ka hapur procedura disiplinore kundër Federatës Serbe të Futbollit në lidhje me çështjen./Opinion.al
