Pas konfirmimit të dy rasteve me koronavirus, Qeveria e Kosovës, në mbledhjen e jashtëzakonshme ka vendosur të mbyllen të gjitha baret, lokalet e natës, si dhe të gjitha qendrat tregtare, e të pezullohen aktivitetet kulturore e sportive.
Kryeministri Albin Kurti theksoi në këtë mbledhje se të gjithë personat që kalojnë në pikat kufitare do të kontrollohen dhe do të hyjnë në karantinë 14 ditore.
Ashtu si edhe në Shqipëri, në vendimin e qeverisë së Kosovës për qendrat tregtare nuk përfshihen farmacitë dhe marketet ushqimore.
“Mbyllja e kafeterive, bareve, pabeve, restoranteve, mbyllja e tregjeve të kafshëve, dhe të automjeteve. Mbyllja e qendrave tregtare, pa përfshirë farmacitë dhe dyqanet ushqimore, dhe pezullimi i gjitha aktiviteteve kulturore e sportive në Kosovë. Përjashtimisht barnatoret dhe marketeve me gjësende ushqimore. Reduktohen veprimet esenciale dhe staf esencial të gjithë sektorin publik, përveç sektorit të shëndetësisë dhe atij të sigurisë. Urdhërohen të gjitha kompanitë private që ta organizojnë punën që shumicën e aktiviteteve punëtoret t’i kryejnë nga shtëpia”, citojnë mediat kosovare Kryeministrin Kurti./Opinion.al
