Komisionerja për Fqinjësinë dhe Negociatat, Marta Kos u shpreh se Shqipëria dhe Mali i Zi mund të përfundojnë me pjesën teknike të negociatave në fund të vitit 2026 ose 2027. Megjithatë ajo u shpreh se ka edhe një pjesë politike, dhe çdo gjë do të varet shumë nga vullneti i shteteve anëtare.
“Po e përshpejtojmë tashmë procesin, sidomos me Ukrainën. Po punojmë 2 deri në 3 herë më shpejtë. Na duhet të bëjmë dallimin mes pjesës teknike të procesit dhe pjesës politike. Pjesa teknike e procesit. Kur bëhet fjalë për pjesën teknike, mund të përmbyllim me Malin e Zi dhe Shqipërinë deri në fund të vitit 2026 ose 2027. Por ka dhe një pjesë politike që do të thotë se asnjë hap i rëndësishëm nuk mund të merret pa vullnetin e vendeve anëtare. Këtu i shoh mundësitë sot. Për pjesën teknike, për të cilën jam e ngarkuar, mund të bëjmë shumë. Jo vetëm për Ukrainën, por edhe për shtetet e Ballkanit Perëndimor. Duhet të flasim dhe po flasim me shtetet anëtare për atë që mund të bëjmë sepse është pjesa teknike, por edhe vullneti politik”, tha ajo.
Komisionerja Kos u shpreh ndër të tjera se, “BE-ja mund t’i sjellë vendet kandidate në BE, jo Shtetet e Bashkuara të Amerikës”./tvklan.al
