Bashkimi Evropian deklaroi se vendimi i presidentit të Shteteve të Bashkuara, Donald Trump, për të ndaluar fluturimet nga Evropa për në SHBA, është marrë “në mënyrë të njëanshme” dhe “pa konsultime”.
“Koronavirusi është krizë globale, nuk është i kufizuar në ndonjë kontinent dhe kërkon bashkëpunim në vend të veprimit të njëanshëm”, thanë përmes një deklarate të përbashkët presidentja e Komisionit Evropian, Ursula von der Leyen, dhe presidenti i Këshillit Evropian, Charles Michel.
“Bashkimi Evropian është duke ndërmarrë veprime të fuqishme për të kufizuar përhapjen e virusit”, shtuan ata.
Duke folur nga Zyra Ovale të mërkurën vonë, Trump njoftoi se fluturimet nga 26 vende të Evropës, që janë pjesë e zonës së lëvizjes së lirë Schengen, për në Shtetet e Bashkuara, do të pezullohen për 30 ditë, për të parandaluar përhapjen e mëtejshëm e Covid-19 në SHBA.
Trump ka thënë se Bashkimi Evropian “ka dështuar të marrë masa parandaluese” sikurse SHBA-ja.
Ai njoftoi po ashtu se Mbretëria e Bashkuar, Irlanda dhe vendet e tjera jashtë Schengenit nuk janë të përfshira nga kjo ndalesë, ndërsa përjashtime bëhen edhe për qytetarët amerikanë./Opinion.al
