Një mjek francez i ka vdekur nga koronavirusi. Lajmin e bëri të ditur ministri francez i shëndetësisë, duke shtuar se kjo është vdekja e parë e një mjeku në vend.
“Unë u informova të Shtunën për vdekjen e një mjeku në spital”, tha Ministri i Shëndetësisë Olivier Véran.
Ai nuk pranoi të jepte më shumë informacione, duke përmendur vendimin e familjes dhe konfidencialitetin mjekësor.
Sipas mediave vendase mjeku ishte pjesë e urgjencës së spitalit në Compiègne, në departamentin francez Oise. Oise ishte një nga zonat e para franceze që u godit rëndë nga virusi.
Mjeku vdiq pasi u transferua për trajtim në Lille.
Véran tha se “familja e madhe e mjekëve” ka paguar “një çmim të rëndë” dhe vlerësoi “guximin e jashtëzakonshëm të mjekëve, infermierëve, zjarrfikësve, të gjithëve që shpëtojnë jetën dita ditës”.
I pyetur për mungesën e maskave brenda spitaleve franceze në mes të një krize shëndetësore, ministri tha: “Ajo që dimë është se shumica e njerëzve në sektorin e kujdesit që do të infektohen nga virusi nuk do ta marrin atë në spitalet ku ata punojnë, por jashtë tyre “.
Dhjetra mjekë të spitaleve kanë kritikuar publikisht qeverinë franceze gjatë javës së fundit, duke denoncuar mungesën e fondeve për spitalet për të cilat ata thonë se janë në gjendje alarmante, dhe paralajmërojnë se shumë po punojnë pa maska për shkak të mungesës, e cila mund të çojë në më shumë infektime. /Opinion.al
