Vijon të përkeqësohet situata e shkaktuar nga pandemia COVID-19 në Britaninë e Madhe. Autoritetet shëndetësore britanike njoftojnë se në 24 orët e fundit kanë humbur jetën 608 persona nga COVID-19, shifra më e lartë ditore që prej 12 majit.
Po ashtu, në harkun kohor të 24 orëve janë konfirmuar dhe 11,299 raste të reja me koronavirus. Numri i rasteve është ulur krahasuar me 15,450 të infektuarit të regjistruar të hënën, por numri i vdekjeve është rritur, pasi të hënën u regjistruan 206 viktima.
Në total, 1,53 milionë britanikë rezultojnë të infektuar, që nga fillimi i pandemisë e deri më tani. Numri i përgjithshëm i vdekjeve brenda 28 ditëve nga testimi për COVID-19, tani është 55,838.
Por shifra të tjera të botuara nga agjencitë e statistikave në Britaninë e Madhe lidhur me vdekjet ku COVID-19 është përmendur në certifikatën e vdekjes, së bashku me të dhëna shtesë për vdekjet që kanë ndodhur ditët e fundit, tregojnë se vendi numëron në total 71,000 raste fatale.
