Pandemia mund të shfrytëzohet nga disa vende si justifikim për shkeljen e të drejtave të njeriut.
Ky është paralajmërimi i Sekretarit të Përgjithshëm të Kombëvë të Bashkuara, Antonio Guterres, i cili thekson se emergjenca shëndetësore rrezikon të kthehet në krizë humanitare.
“Po shohim efekte disproporcionale në komunitete të caktuara, rritje të gjuhës së urrejtjes, shënjestrim të grupeve më të cenueshme dhe rrezikun e një kundërpërgjigjje me grusht të hekurt të sigurisë që minon reagimin shëndetësor”, deklaroi Guterres.
Guterres prezantoi rezultatet e një raporti të ri të OKB, ku vihet theksi tek roli prioritar që duhet të kenë të drejtat e njeriut në krizat shëndetësore, sociale dhe ekonomike që përfshijnë globin. Në raport thuhet se emigrantët, refugjatët dhe personat e shpërngulur janë mes kategorive më të cenueshme.
“Në disa vende, kriza mund të kthehet në një pretekst për zbatimin e masave represive që nuk kanë lidhje me pandeminë. Kjo është e papranueshme”, u shpreh Guterres.
Gueterres iu kërkoi qeverive të jenë transparente dhe të përgjegjshme, duke mos harruar se të drejtat e qytetarëve janë jetësore./Opinion.al
