“Ne kemi izoluar virusin ”. Kështu deklaroi, ministri italian i Shëndetësisë Roberto Speranza, gjatë një konference për shtyp sa i përket koronavirusit.
“Të izolosh virusin do të thotë shumë mundësi që të jesh në gjendje ta studiosh atë, të kuptosh dhe verifikosh më mirë se çfarë mund të bëhet për të bllokuar përhapjen“, theksoi ministri, ndërsa “provat” sipas tij do t’i jepen gjithë bashkësisë ndërkombëtare.
Edhe drejtori i institutit shkencor “Spallanzani”, Giuseppe Ippolito tha se tani do të jetë më e lehtë për të gjetur një vaksinë. “Italia bëhet partneri referues për këtë studim”, tha ai.
Teksa vjen ky lajm pozitiv, zyrtarët kinezë në provincën qendrore Hubei, bënë të ditur se të paktën 304 persona kanë vdekur dhe më shumë se 14,000 rezultojnë të infektuar nga koronavirusi. Të dielën u njoftua rasti i parë i vdekjes jashtë Kinës, në Filipine.
Australia, Japonia dhe Singapori kanë njoftuar kontrolle të rrepta ndaj të udhëtarëve të huaj, të cilët kanë qenë kohët e fundit në Kinë. SHBA njoftoi më herët kufizime të ngjashme dhe shpalli gjendjen e emergjencës shëndetësore. Masa të ngjashme ka njoftuar edhe Izraeli, Malajzia, Mongolia dhe Filipinet.
Tajvani gjithashtu njoftoi kufizime të fluturimeve të shtunën. Të shtunën, sekretari i Mbrojtjes Mark Esper miratoi një kërkesë të Departamentit të Shëndetit dhe Shërbimeve Njerëzore për të ndihmuar në strehimin e 1 mijë personave që mund të kenë qenë të ekspozuar ndaj koronavirusit dhe që duhet të vendosen në karantinë pas mbërritjes në SHBA./ Opinion.al
