Ministrja e Shëndetësisë, Ogerta Manastirliu ka njoftuar sot se nga 36 rastet e testuar për koronavirus në Shqipëri, asnjë nuk ka rezultuar me koronavirus.
“Edhe pse të gjitha strukturat e shëndetësisë janë të fokusuara tek masat për parandalimin e koronavirusit të ri, nuk e kemi humbur fokusin nga programet e rindërtimit, nga premtimet tona. Ndërkohë vijon pajisja me mjete të mbrojtjes personale të të gjithë strukturave të shëndetësisë. 1.2 milione maska po shpërndahen ndërsa janë edhe 1 milion dollarë në dispozicion të spitaleve për të rritur stokun e mjeteve të mbrojtjes personale. Duhet thënë se deri tani janë testuar 36 raste, të cilat kanë rezultuar negative”, tha Manastirliu teksa ka inspektuar qendrën shëndetësore Bathore 3.
Shqipëria vijon të mbetet jashtë hartës së vendeve të botës të prekura nga koronavirusi i cili ditët e fundit po përhapet me shpejtësi në vendet jashtë Kinës. Problematike situata paraqitet në Korenë e Jugut dhe në Italinë fqinje. /Opinion.al
