Komisioni i Pavarur i Kualifikimit ka njoftuar se për shkak të situatës së krijuar nga koronavirusi do të mbyll pritjen me publikun. Denoncimet mund të bëhen në postë ose online.
Godina e Komisionit të Pavarur të Kualifikimit do i mbaj dyert e mbyllura për qytetarët deri në një njoftim të dytë.
“Komisioni i Pavarur i Kualifikimit njofton se duke nisur nga data 9/3/2020 shërbimi i pritjes me qytetarët në ambientet e KPK-së do të ndërpritet. Kjo në kuadër të rritjes së masave parandaluese dhe për arsye të situatës së përhapjes së infeksionit të shkaktuar nga Covid-19 (Coronavirus i ri), me qëllim mbrojtjen e shëndetit të qytetarëve. Sqarojmë qytetarët se deri në një njoftim të dytë zyrtar nga Komisioni, denoncimet mund t’i dorëzojnë nëpërmjet postës zyrtare, ose mund t’i regjistrojnë online nëpërmjet faqes zyrtare të internetit të Komisionit kpk.al, rubrika “Denonco”. Ju falënderojmë për mirëkuptimin!”-shkruhet në njoftimin e KPK.
Kujtojmë që, deri më tani në vendin tonë janë konfirmuar 6 persona të cilët janë infektuar nga koronavirusi. Sipas informacioneve, gjendja e tyre është e stabilizuar dhe janë nën kujdesin e vazhdueshëm të mjekëve.
Rasti i parë që u konfirmuar me koronavirus është një 28 vjeçar i cili kishte qenë në Itali, por pak ditë pasi është kthyer në Shqipëri, ka ndjerë simptomat e virusi. Ndërkohë, katër të infektuarit e tjerë janë familjarët e 28-vjeçarit. Ndërsa i 6 është një 31-vjeçar i cili kishte udhëtuar drejt Milanos ku kishte vizituar për disa orë dajën e tij në Spital. Por, kaq ka mjaftuar që ai të bëhej bartës i virusit./ Opinion.al
