Koronavirusi ka shënuar një tjetër viktimë në radhët e bluzave të bardha në vendin tonë. Mësohet se ka humbur jetën si pasojë e COVID-19 radiologu nga Berati, Gëzim Lamaj, i cili ishte i shtruar prej ditësh në spitalin Infektiv në Tiranë.
Lajmin e trishtë e ka dhënë deputeti i PS në Berat, Fadil Nasufi, i cili shkruan se mjeku Lamaj ishte humanist i rrallë.
“Berati zgjohet sot me një lajm trishtues dhe tepër tronditës! Ndahet nga jeta pas një beteje me Covid -19 Dr Gëzim Lamaj, Mjek radiolog! Njeri i mrekullueshëm, humanist i rrallë si ai, gojëmbel, fytyrëqeshur, model i mirësisë dhe i përkushtimit ndaj qytetarëve të Beratit! Na janë shteruar fjalët nga helmi i përditshëm i vdekjes! Ndarja nga jeta e Dr Gëzimit, pikëllon gjithë qytetarët beratas dhe bluzat e bardha.
Është hidhërim i pa ngushëllueshëm, por edhe apel për kujdes nga ky virus vrastar!
Ngushëllime Dr Anilës për humbjen e bashkëshortit dhe djalit Renatos për humbjen e babait! Të prehet në paqe Dr Gëzim Lamaj! Lamtumirë Mik i çmuar!”, shkruan Nasufi në Facebook.
