Shqipëria është zyrtarisht në hartën e vendeve të prekur nga koronavirusi. Mbrëmjen e djeshme ministria e Shëndetësisë konfirmoi dy rastet e parë, të cilët ishin babë e bir, të moshës 54 dhe 28 vjeç.
Sipas ministrisë, 28 vjeçari është futur në vendin tonë përmes pikës kufitare të Hanit të Hotit. Por pas publikimit të këtij njoftimi ka reaguar Dogana e Hanit të Hotit, e cila ka hedhur poshtë pretendimet e Ministrisë së Shëndetësisë.
Sipas informacioneve, i riu rezulton se ka kaluar nga pika kufitare e Murriqanit.
“Dogana e Hanit te Hotit deri tani rrezon deklaratën e Ministrisë se Shëndetësisë. Shtetasi 28 vjeçar, për te cilin ministria ka dhëne emrin nuk rezulton se ka kaluar ne doganën e Hanit te Hotit por atë te Muriqanit. Po ashtu babai i tij nuk rezulton i regjistruar as në Murriqan as në Hanin e Hotit. Efektivet e shërbimit në piken e Hanit te Hotit prej 4 orësh kane kontrolluar sistemin por nuk rezulton. Madje sistemi është kontrolluar qe nga data 19 shkurt dhe nuk ka asnjë person me atë emër. Shtetasi P.K, 28 vjeç rezulton qe ka hyre drejt Shqipërisë nga Murriqani ndërsa babai nuk rezulton i regjistruar ne asnjë prej doganave. 28 vjeçari është larguar nga Shqipëria ne janar dhe është rikthyer ne 26 shkurt”, bën të ditur Dogana e Hanit të Hotit./ Opinion.al
