Duket se Kina, vendi ku shpërtheu koronavirusi, po lufton “betejat e fundit” me Covid-19. Kështu, autoritetet shëndetësore raportojnë se në 24 orët e fundit në Kinë janë regjistruar vetëm 15 raste të reja me koronavirus.
Sipas të dhënave 8 të prekur të rinj u raportuan në Wuhan, qendra e shpërthimit, ndërsa të tjerët kanë ardhur nga provinca të tjera.
Komisioni Kombëtar i Shëndetit bën me dije se numri i përgjithshëm i të infektuarve ka arritur në 80 793 ndërsa i viktimave 3169.
Ndërkohë që shifrat në Kinë janë shpresëdhënëse, një ekip prej 5 mjekësh kinezë do të niset drejt Italisë për të ofruar asistencën e tyre, duke qenë se momentalisht në vendin fqinj situata nga koronavirusi është ndër më të rëndat.
Marrëveshja për të dërguar ekipin e ekspertëve është arritur pas një bisede telefonike mes ministrit të Jashtëm, Di Maio me homologun Wang Yi./Opinion.al
