Koreja e Veriut ka arrestuar tre zyrtarë të një kantieri detar pas incidentit të ndodhur gjatë hedhjes në det të një anijeje të re luftarake.
Gjatë ceremonisë së lëshimit të luftanijes pesë mijë tonëshe, pjesë të poshtme të trupit të saj u dëmtuan, duke e bërë atë të humbasë ekuilibrin dhe të anohet në ujë.
E gjitha ndodhi në sy të udhëheqësit të Koresë së Veriut, Kim Jong Un, i cili e cilësoi incidentin si një “akt kriminal”.
Agjencia zyrtare e lajmeve në vend, KCNA, bëri të ditur se të ndaluarit janë inxhinieri kryesor i kantierit verior në Chongjin, ku u ndërtua anija, drejtuesi i ndërtimit dhe një përgjegjës administrativ. Sipas raportit, këta tre persona mbajnë përgjegjësi për incidentin.
Të premten, KCNA raportoi se edhe drejtori i kantierit, Hong Kil Ho, është marrë në pyetje nga autoritetet ligjzbatuese.
Pamjet satelitore treguan anijen e anuar dhe të mbuluar me mushama blu, ndërsa një pjesë e saj dukej se ishte mbi tokë.
Kim Jong Un deklaroi se aksidenti ishte pasojë e “neglizhencës absolute dhe e papërgjegjshmërisë”. Ai kërkoi ndëshkime të rënda për përgjegjësit, të cilët sipas tij, nuk u treguan aspak të kujdesshëm duke nëpërkëmbur dinjitetin kombëtar.
Nuk dihet se me çfarë dënimi mund të përballen të ndaluarit, por Koreja e Veriut njihet për historikun e saj të dobët në fushën e të drejtave të njeriut.
Raste të tilla raportohen rrallë nga mediat shtetërore të vendit, edhe pse ka pasur disa përjashtime në të kaluarën.
Ky incident vjen disa javë pasi Koreja e Veriut prezantoi një tjetër luftanije, “Choe Hyon”, që Kim e quajti një “përparim” në modernizimin e marinës dhe që pritet të vihet në përdorim në fillim të vitit të ardhshëm.
