Vijojnë hetimet nga Policia e Korçës dhe nga ajo e Fierit për të zbardhur motivet e vrasjes së 25-vjeçarit nga Lushnja, trupi i të cilit u gjet i pajetë ditën e djeshme në rezervuarin e Gjançit, në qytetin e Korçës.
Mësohet se pista ku janë përqendruar hetimet është ajo e larjes së hesapeve të pazareve të drogës.
Sakaq, bëhet me dije se janë identifikuar autorët e krimit dhe janë shpallur në kërkim.
25-vjeçari u gjet me duar të lidhura dhe plagë të shumta të shkaktuara nga goditjet me mjete të forta. Këto fakte bëjnë që policia të dyshojë që 25-vjeçari mund të jetë vrarë në një zonë tjetër të vendit dhe më pas është transportuar drejt Korçës. Ekspertiza mjeko-ligjore konstatoi që vrasja mund të jetë kryer disa ditë më parë.
Ndërkohë familjarët kanë tërhequr trupin nga morgu i spitalit të Korçës pas kryerjes së autopsisë./Opinion.al
