Vendimi i Këshillit të Ministrave për ti kaluar Kopshtin Botanik në pronësi Bashkisë së Tiranës është konsideruar shkelje e hapur e autonomisë universitare nga rektori i Universitetit të Tiranës, Mynyr Koni.
Në një deklaratë për mediat ai tha se ky vendim është marrë duke ndjekur procedura të parregullta nga ana ligjore dhe në mungesë të plotë transparente nga Ministria e Arsimit, Rinisë dhe Sportit.
“Dëshiroj të theksoj me forcë se, marrja e këtij Vendimi është në shkelje të hapur të autonomisë të Universitetit të Tiranës dhe në kundërshtim të plotë me ligjin e arsimit të lartë 80/2015”, thotë Koni.
Koni sqaroi se pas pushimeve verore ka thirrur Senatin Akademik për të shqyrtuar dhe mbajtur një qëndrim ndaj kësaj VKM-je. Por në këtë mbledhje nuk u arrit asnjë përfundim kështu që rektori i UT-së, caktoi datën 19 Shtator, për mbledhjen e Senatit Akademik.
“Në këtë mbledhje, disa anëtarë të Senatit Akademik, kërkuan të thërriteshin përfaqësues të Bashkisë Tiranë, në mënyrë që, sipas tyre, të dëgjoheshin se çfarë do të bëhej konkretisht në Kopshtin Botanik, ndërkohë që VKM, tashmë ka hyrë në fuqi dhe sipas saj, Universitetit të Tiranës, i hiqet prona me emërtimin “Kopshti Botanik” dhe i kalon në pronësi Bashkisë Tiranë, duke i hequr përfundimisht edhe të drejtën e administrimit nga UT të kësaj prone.
Në mënyrë të përsëritur, disa anëtarë të Senatit Akademik, duke përdorur përsëri artifica, me një sjellje aspak të denjë për një anëtar të Senatit Akademik, si organi kolegjial më i lartë akademik i UT, i cili është përgjegjës për përmbushjen e misionit të institucionit, bënë që përsëri, Senati Akademik i UT, të mos dilte me një qëndrim zyrtar në lidhje me VKM nr.510 datë 17.07.2019.
Fatkeqësisht kjo është e vërteta dhe ajo çfarë ndodh në Senatin Akademik të UT, edhe kur bëhet fjalë për marrje apo tjetërsim të pronave të UT dhe të ambjenteve të pedagogëve dhe studentëve të UT, në kushedi çfarë…. koha do ta tregojë shumë shpejt”, tha Koni.
Rektori i Universitetit të Tiranës theksoi se do të vazhdojë ta kundërshtojë këtë VKM deri në anulimin e saj.
“Të gjithë autorët dhe bashkautorët që kanë marrë pjesë në këtë maskaradë, dua t’i siguroj se një ditë, do të japin llogari dhe do të përgjigjen jo vetëm para ligjit, por edhe para fëmijëve apo nipërve të tyre; apo edhe ata që nuk reaguan apo nuk ngritën zërin për ta ndalur atë, dhe me veprimet apo mosveprimet e tyre, bën që të vetmin Kopsht Botanik, me vlera unikale dhe të pazendësueshme, e lejuan të mos jetë më i tillë”, përfundoi deklaratën e tij Mynyr Koni. /Opinion.al
