Kryetari i Partisë Demokratike, Lulzim Basha ka shkuar këtë të hënë në Prokurorinë e Tiranës, për kontratat e lobimit. Sipas burimeve nga PD, kjo lëvizje u bë pasi siç thonë organi i akuzës “hoqi dorë nga kërkesa e paligjshme për thirrjen për njohje me aktet”.
“Behej fjalë për njohjen me letërporositë që kanë shkuar që në gusht në Prokurori dhe i bëjnë publike tani, sipas axhendës politike të Ramës”, thotë një burim nga PD, që sipas tij pas refuzimit të kërkesës për paraqitje ditën e enjte në selinë blu ka shkuar një tjetër shkresë.
Sipas kësaj shkrese, Basha duhet të jap dëshmi cilësinë e personave që kanë dijeni për ngjarjen. Në Prokurorinë e Tiranës ka mbërritur një pjesë e letër-porosive nga SHBA për këtë hetim. Në informacionin e përkthyer tashmë ka dyshime mbi origjinën e 600 mijë dollarëve, të cilat janë përdorur për lobimin e PD në Amerikë, Pranverën e 2017-s. Këto para vijnë na kompania Biniata Trade, e cila është në pronësi të dy shtetasve rusë.
“Çështja që po hetohet me kërkesë të Partisë Demokratike është nëse këto formularë janë mbushur, apo jo siç duhet. Ky është hetimi e jo një gënjeshtrat e shpifjet, për të cilat është investuar fuqishëm nga qeveria e cila a aktivizon këtë hetim sa herë i duhet për nevoja politike“, deklaroi Basha, pasi doli nga Prokuroria.
“Ka një vit e gjysmë që ka nisur ky hetim, ka më shumë se 6 muaj që kanë ardhur përgjigjet nga SHBA dhe Britania e Madhe të cilat tregojnë se as PD dhe asnjë drejtues i PD-së nuk ka shkelur asnjë ligj, as në Shqipëri, as në SHBA dhe as Britaninë e Madhe”, theksoi më tej Basha
Deklarata e plotë
Jemi thirrur sot në prokurori për të dhënë informacione si persona që mund të kenë dijeni për rrethanat e hetimit. Dua ta bëj të qartë, për gjithësecilin prej jush sot këtu dhe, përmes jush, të gjithë qytetarët, se hetimi i hapur tashmë prej një viti e gjysëm bëhet mbi bazën e nenit 190 për çeshtjen e plotësimit të formularëve të deklarimit në Komisionin Qëndror të Zgjedhjeve.
Pra çeshtja që po hetohet me kërkesë të Partisë Demokratike, është nëse këta formularë janë mbushur apo jo siç duhet. Ky është hetimi dhe jo gënjeshtrat dhe shpifjet për të cilat është investuar fuqimisht qeveria e cila e aktivizon këtë hetim, sa herë i duhet për nevoja politike.
Ka një vit e gjysëm që ka nisur ky hetim, ka më shumë se gjashtë muaj që kanë ardhur përgjigjet nga SHBA dhe Britania e Madhe, nga Skocia, të cilat vertetojnë se as Partia Demokratike, as një drejtues i PD nuk ka shkelur asnjë ligj, as në Shqipëri, as në SHBA dhe as në Britaninë e Madhe.
Ndaj i kam kërkuar prokurorisë dhe ju nxis ju t’i kërkoni t’i bëjë publike përgjigjet e ardhura nga SHBA dhe Britania e Madhe.
Pyetje: Kur jeni njohur me letërporositë?
Basha: Sot
Pyetje: Çfarë thoshin letërporositë?
Basha: Unë edhe njëherë ju nxis t’i kërkoni prokurorisë të bëjë publike përgjigjet e ardhura prej më shumë se gjashtë muajsh nga SHBA dhe Britania e Madhe, të cilat vërtetojnë se PD dhe drejtuesit e saj nuk kanë shkelur asnjë ligj. /Opinion.al
