Prokuroria e Posaçme ka nisur verifikimet në lidhje me kontratën e lobimit të Partia Demokratike e cila u bë publike ditët e fundit. Bëhet fjalë për kontratën me vlerë 6 milionë dollarë për 2 vjet me një kompani në Washington DC. Kjo kontratë është firmosur më 4 Prill nga Sekretari i Përgjithshëm i PD-së, Flamur Noka.
Sipas Partisë Demokratike, është komuniteti shqiptaro-amerikan që përmes fondacionit “Make Albania Great Again” ka kontraktuar kompanine “Continental” për të ndihmuar në konsolidimin e marrëdhënieve miqësore të PD-së si forca më e madhe opozitare me Kongresin dhe qeverinë e SHBA. Synimi i bashkëatdhetarëve në SHBA, sipas PD është bashkëpunimi me aleatin kryesor të Shqipërisë për të rivendosur demokracinë funksionale dhe shtetin e së drejtës në Shqipëri. Partia Demokratike thekson se kompania “Continental” drejtohet nga Ambasadori Carlos Trujillo i cili njihet gjithashtu dhe si avokat i Presidentit Trump dhe si anti-komunist i palëkundur në qëndrimet e tij!
Po ashtu PD sqaron se, “kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë dhe punojnë prej dekadash në SHBA si dhe demokratë të tjerë të larguar nga Shqipëria këto 10 vite për shkak të regjimit të Edi Ramës.”
Në fund PD thotë se “ndonëse ka dhënë dakordësinë për marrjen e këtij shërbimi në përputhje të plotë me ligjet e të dy vendeve, nuk ka asnjë barrë financiare apo detyrim kontraktual që lind nga kjo marrëveshje”.
Si garant në SHBA, sipas asaj që shkruhet në këtë kontratë, ka dalë një person me emrin Nuredin Seci. Po ashtu në kontratë përcaktohet se “Klienti do t’i paguajë firmës një tarifë fikse mujore prej 250,000 dollarësh për një paketë gjithëpërfshirëse mbështetjeje që përfshin lobim, avokim dhe nisma strategjike ligjore për një periudhë prej 2 vitesh”. “Continental Strategy” është një firmë konsulence dhe lobimi me bazë në Shtetet e Bashkuara, e specializuar në marrëdhënie me qeverinë dhe strategji politike.
Klan News
