Ish-kryeministri i Italisë, Mario Draghi, i cili ka mbajtur edhe postin e shefit të Bankës Qendrore Europiane, është fotografuar teksa hante një drekë të thjeshtë në mesin e shumë pasagjerëve të tjerë në aeroport.
Revista “Forbes” e rendiste para pak vitesh si njeriun e 18-të më të pushtetshëm në botë dhe në botën e politikës ai njihet për aftësinë e jashtëzakonshme për të lundruar në politikat evropiane.
Mirëpo këto nuk e bëjnë aspak të ndryshëm ish-kryeministrin italian nga pasagjerët dhe qytetarët e tjerë, të cilët as që e vunë re praninë e tij teksa drekonte në aeroport si një njeri i zakonshëm.
Me një thjeshtësi për t’u vlerësuar, ai është fotografuar duke konsumuar ushqimin e aeroportit me një copë buke në dorë dhe një gotë ujë në tavolinën ku qëndron i vetëm.
Kontrasti është i madh, nga sa jemi mësuar të shohim ne shqiptarët, ku edhe një deputet i një zone rurale shfaq më shumë luks. Por jo Draghi, ai qëndron i vetëm, pa truproja, pa fluturime “VIP”.
