Deputetët e parlamentit të ri grek të zgjedhur më 7 korrik, kryen betimin ditën e sotme gjatë ceremonisë së konstituimit të trupës së re të ligjvënësve.
Fillimisht 300 deputetët kryen betimin fetar, dhe më pas kryen betimin politik. Ky i fundit u krye vetëm nga deputetët që e dëshironin, dhe që vinin kryesisht nga rradhët e së majtës.
Pas betimit, deputetët u njoftuan se të enjten do të zhvillohet procesi i zgjedhjes së kryetarit të ri të parlamentit. Demokracia e re ka nominuar për këtë post deputetin Konstantinos Tasoulas, ndërsa ish kryeministri Tsipras ka deklaruar se kandidatura e Tasoulas do të votohet edhe nga SYRIZA.
Parlamenti i ri grek ka 61 femra, ndërsa 112 deputetë zgjidhen për herë të parë. Në total Demokracia e re ka 158, SYRIZA-Aleanca Progresive 86, Lëvizja për Ndryshim (KINAL) 22, Partia Komuniste 15, “Zgjidhja Greke” 10, MERA25 e ish ministrit Varoufakis, 9. /Opinion.al
